Ministri i Shtetit për Pushtetin Vendor, Ervin Demo në konferencën e sotme për shtyp u ndal tek reforma territoriale duke theksuar se ky proces duhet të jetë gjithëpëfshirës dhe transparent.
“Reforma territoriale është një instrument jashtëzakonisht i rëndësishëm për të garantuar që bashkitë që në nisje të kenë mundësitë, asetet, kapacitetet e duhura dhe mbi të gjitha potencialin e mundshëm nga pikëpamja e rritjes ekonomike, që ti përballojnë të gjitha këto sfida”, theksoi Demo.
Ministri Demo u shpreh se “reformë territoriale e kemi në komisionin parlamentar, ku të gjitha partitë janë të përfshira në atë komision. Kuptohet që procesi, i cili do të fillojë për pak ditë duhet të jetë transparent dhe gjithëpërfshirës, jo vetëm bashkitë, por e gjithë shoqëria në tërësi duhet të jetë e përfshirë”.
Nuk duhet të perceptojmë, vijoi Demo, se ky është një proces që do të ndryshojë kufijtë e bashkive, kjo do të ishte një qasje e gabuar nga të gjitha aktorët që merren me këtë sfidë që kemi përpara.
“Reforma territoriale duhet të bazohet në të dhënat, në eksperiencën që ne tashmë kemi çfarë ka ndodhur gjatë 10 viteve të fundit në territor. Reforma e fundit ka marrë jetë në 2015, jemi fiks pothuajse 10 vjet. Cilat kanë qenë sfidat që bashkitë janë ballafaquar, e cila prej tyre është ballafaquar me sukses nga ana e bashkive, cilat janë funksionet që bashkitë nuk kanë arritur dot t’i ofrojnë në territor për shkak se kanë pasur mungesë kapacitetesh, qoftë edhe financiare apo problematika të tjera”, nënvizoi Demo.
Demo e vuri theksin edhe tek rëndësia që ka kjo reformë jo thjesht nga pikëpamja politike, por për mënyrën së si do të menaxhohet territori për të pasur shërbime më të mira.
“Reforma territoriale është një hap shumë i rëndësishëm një sfidë jo e vogël, por një mundësi e jashtëzakonshme që nëse e përsërisim duhet që të mos durojë 10 vjet, por të zgjasë edhe më shumë. Ne kemi bërë një kapërcim shumë të madh në 2014 nga një numër shumë i lartë kaluam në 61 bashki. Shqipëria në 20 vitet e fundit ka ndryshme qoftë edhe demografike”, tha Demo.
I pyetur nëse ka ndërmend ndonjë numër për bashkitë, Demo tha se duhet të jetë një vlerësim i kujdesshëm.
“Studime ka pafund dhe shumë prej tyre janë publike sepse janë bërë falë asistencës së donatorëve ndër vite, studime për trendet demografike. Besoj që komisioni i posaçëm tashmë do të fillojë procesin. Patjetër që do të ketë një dokument të parë që do të jetë për diskutim publik. Nuk do të flas në fillim dhe besoj ky do të jetë procesi, për numrin e bashkive, por për konceptin. Si e duam një bashki? Si mund të ketë sukses? Cilat janë sfidat? Ne si ministri, do të mbështesim komisionin me informacion, publikun, bashkitë për këtë reformë”, tha Demo.
Demo u shpreh se “kemi marrëdhënie të shëndetshme me aktorët që kanë qenë partnerë të jashtëzakonshëm dhe kanë një databazë njohurish. Duam t’i kemi të përfshirë dhe roli i ministrisë është që ta akomodojë. Aleanca nuk është thjesht për reformë, por duhet të kuptojmë që sfida është që reforma të marrë jetë. Aleanca duhet të jetë sa më e gjerë dhe publiku i përfshirë”.