Kryeministri Edi Rama ka publikuar një postim në rrjetin social Facebook, ku prezanton pamjen e re të Gjimnazit “Kolë Idromeno” në Shkodër, pas përfundimit të punimeve të rikonstruksionit.
Në mesazhin e tij, Rama thekson se objekti shkollor tashmë ofron hapësira të rinovuara dhe infrastrukturë moderne, duke përfshirë laboratorë inteligjentë, terrene për aktivitete sportive, si dhe ambiente për arte dhe zeje. Sipas kryeministrit, investimi është realizuar duke ruajtur elementet lokale të qytetit dhe duke rikthyer dinjitetin e emrit të piktorit dhe arkitektit të shquar Kolë Idromeno.
Rama shton se shkolla do t’u shërbejë rreth 400 nxënësve, mësuesve dhe gjithë komunitetit të Shkodrës, ndërsa postimin e tij e mbyll me urimin për një ditë të mbarë për të gjithë qytetarët.
“MIRËMËNGJES dhe me këtë pamje krejtësisht të re të Gjimnazit “Kolë Idromeno” në Shkodër, me hapësira të rinovuara dhe infrastrukturë moderne, nga laboratorët inteligjentë te terrenet për aktivitete sportive, arte dhe zeje, falë një investimi që ruan elementet lokale të qytetit dhe rikthen dinjitetin e emrit të piktorit dhe arkitektit të shquar që mban, në shërbim të rreth 400 nxënësve, mësuesve dhe gjithë komunitetit, ju uroj një ditë të mbarë”, shkruan Rama.