Agjencia Shtetërore e Kadastrës informon qytetarët mbi shërbimin “Kërkesë për kalimin e pronësisë të truallit shtetëror në përdorim”, i cili u vjen në ndihmë individëve dhe subjekteve që përdorin truall shtetëror, por nuk disponojnë akt pronësie për të, ose kanë një akt të pavlefshëm sipas legjislacionit në fuqi.
Ky shërbim u jep mundësinë qytetarëve të pajisen me dokument pronësie për truallin, në rastet kur ata zotërojnë ose mund të regjistrojnë akt pronësie vetëm për ndërtesën e ndërtuar mbi truall shtetëror.
Për të përfituar nga shërbimi, trualli dhe ndërtesa duhet të jenë në posedim të subjektit aplikues, ndërtesa duhet të jetë përfituar ligjërisht përmes privatizimit, blerjes nga ndërmarrjet shtetërore, ish-kooperativat bujqësore ose njësitë e vetëqeverisjes vendore, apo të jetë ndërtuar mbi bazë lejeje ndërtimi të lëshuar pas vitit 1991.
Gjithashtu, ndërtesa duhet të ketë funksion banimi ose funksion social-ekonomik, ndërsa trualli duhet të jetë pronë shtetërore dhe jo pronë publike e patjetërsueshme.
Në rastet kur ndërtesa ka funksion banimi, kalimi i truallit shtetëror në pronësi kryhet pa pagesë, duke u dhënë qytetarëve mundësinë të përfitojnë pronësinë mbi truallin pa kosto financiare. Në varësi të statusit të ndërtesës, aplikuesit duhet të paraqesin dokumentacionin përkatës, si: kontratë pronësie mbi ndërtesën e shoqëruar me genplan ose planimetri, ose leje ndërtimi me genplan përkatës, deklaratë noteriale që ndërtesa nuk është tjetërsuar tek persona të tretë kur kërkohet, kontratë kalimi pronësie ose certifikatë apo vërtetim regjistrimi në regjistrin kadastral në rastet kur ndërtesa është e regjistruar, si dhe vërtetim nga drejtoria rajonale tatimore për pagesën e taksës së truallit në përdorim nga data 7 qershor 2010 deri në momentin e aplikimit.
Aplikimi për këtë shërbim realizohet online përmes portalit e-Albania, ndërsa dokumentet origjinale dërgohen edhe me postë pranë drejtorisë vendore përkatëse të Agjencisë Shtetërore të Kadastrës.
Për të përfituar nga ky shërbim, duhet të plotësohen disa kritere bazë:
- trualli dhe ndërtesa të jenë në posedim të subjektit aplikues;
- ndërtesa të jetë përfituar ligjërisht, përmes privatizimit, blerjes nga ndërmarrjet shtetërore, ish-kooperativat bujqësore ose njësitë e vetëqeverisjes vendore, ose të jetë ndërtuar mbi bazë lejeje ndërtimi të lëshuar pas vitit 1991;
- ndërtesa të ketë funksion banimi ose social-ekonomik;
- trualli të jetë pronë shtetërore dhe jo pronë publike e patjetërsueshme.
Në varësi të statusit të ndërtesës, qytetarët duhet të paraqesin dokumentacionin përkatës, si: kontratë pronësie mbi ndërtesën, shoqëruar me genplan ose planimetri, ose leje ndërtimi dhe genplan përkatës;
- deklaratë noteriale që ndërtesa nuk është tjetërsuar tek të tretët, kur kërkohet;
- kontratë kalimi pronësie ose certifikatë/vërtetim regjistrimi në regjistrin kadastral, në rastet kur ndërtesa është e regjistruar;
- vërtetim nga drejtoria rajonale tatimore për pagesën e taksës së truallit në përdorim, nga data 7 qershor 2010 deri në momentin e aplikimit.