Vetëgjyqësia vijon të mbetet një nga plagët sociale më të ndjeshme në Shqipëri, duke mbajtur të izoluara qindra familje.
Për këtë temë u diskutua në emisionin e sotëm, 12 shkurt, në “Aldo Morning Shoë”, në Tv Klan, ku ishte i ftuar dhe Gjin Marku, Kryetar i Komitetit për Pajtimin Kombëtar.
Marku u shpreh se aktualisht, rreth 250 familje jetojnë në ngujim, të privuara nga liria, arsimi dhe jeta normale për shkak të konflikteve të trashëguara dhe mungesës së zgjidhjeve përfundimtare.
“Ke 250 familje të paktën, se mund të jenë dy-tre të tjera të kohëve të fundit që kanë probleme, që na kanë ardhur sinjalet. Por, mund të jenë 255 gjithsej, por 250 janë të sigurta që ato janë në ekstrem të marrëdhënieve mes tyre. I thonë 1 mijë persona. 1 mijë persona nën risk”, u shpreh Marku.
Por, ku jetojnë këto familje? Sipas Markut, trendi paraqitet që ata të jetojnë në metropole, por të “maskuar”, pra me identitet plotësisht të ndryshëm, si formë për vetëmbrojtjeje. Gjithashtu ka dhe nga ata persona të cilët jetojnë në zona të thella, por numri i tyre është më i pakët. Fëmijët e këtyre familjeve, pavarësisht se gëzojnë identitet të ri, nuk bëjnë dot një jetë normale, pasi nuk kanë mundësinë të arsimohen.
“Këta jetojnë zakonisht në metropole dhe ka ndonjë që jeton në zona të thella. Mund të jetë ndonjë nga këta që shkon në jug, por zakonisht trendi është drejt metropoleve, ku gjejnë mundësinë për të shkuar të maskuar. Madje fëmijët e tyre nuk shkojnë në shkollë, por i ndihmojnë prindërit me punë të ndryshme dhe qëndrojnë të maskuar”, tha ai.
Sipas Markut, qarku Tiranë është një ndër destinacionet kryesore të këtyre familjeve.
“Absolutisht, i ke në Kamëz, i ke tek Blloku, i ke kudo”, tha ai.
“Vijnë në Tiranë, në Durrës, në Fier”, shton ai.
Një nga arsyet më madhore të gjakmarrjes është “çështja e nderit”. Bëhet fjalë për “nderin” e vajzës e të familjes së saj. Marku sqaron se cenim nderi është dhuna apo trafikimi i vajzës, lidhjet e papranueshme për familjen, si dhe fejesa e prishur nga ana e djalit.
“Ndoshta i kanë dhunuar vajzën, e kanë çuar për ta trafikuar, ka pasur hyrje dhe në çështjet familjare, lidhje si të thuash të papranueshme…
Fejesa e prishur, nëse ka qenë me shkuesi, ose nëse familjet e kanë bërë publike, si të thuash kanë marrë gëzimin e shoqërisë, pastaj zhgënjimi për ‘ta është cënim nderi.
Nuk quhet cenim nderi nëse e braktis vajza djalin, por kur e braktis djali vajzën, se kjo është më e rënda”, sqaron ai.
Bazuar në të gjitha këto, kryetari i Komitetit të Pajtimit Kombëtar, shprehet se ka pasur dhe viktima të vetëgjyqësisë për shkak të vendimeve të marra nga drejtësia.
“Historitë janë të tmerrshme të lexosh dosjet që ne marrim. Shpesh herë, vendimet e gjykatave na kanë sjellë deri më tani rreth 4 mijë të vrarë”, tha ai./Klan