Përfaqësues të Transportit interurban të qytetit të Vlorës kanë dalë këtë të hënë në një protestë paqësore, në rrugën që lidh aksin Transballkanike me autostradën e Vlorës.
Siç raportohet shkak i protestës është zhvendosja e vendqëndrimit të ri të autobusëve interurban në hyrje të qytetit, duke u larguar nga zona e mëparshme përgjatë rrugës së re.
Drejtuesit e mjeteve kundërshtojnë vendimin e miratuar në Këshillin Bashkiak, sipas të cilit të gjithë autobusët për pritjen dhe nisjen e pasagjerëve do të kenë pikën e tyre të përbashkët pranë hyrjes së autostradës.
“Ne s’jemi fare dakord, nuk kemi bërë asnjë marrëveshje me bashkinë, që thotë kemi bërë marrëveshje, kemi rënë dakord me autobusët. Ne nuk kemi rënë dakord! Këtu nuk plotësohet asnjë kusht. Këtu qytetari është i rrezikuar, shoferët janë të rrezikuar, dhe ne nuk jemi dakord fare. S’ka kushtet më minimale, s’kemi ku të qëndrojmë, ku të vëmë një biletari.”, tha një prej përfaqësuesve të Shoqërisë Interurbane.
Sipas shoferëve dhe operatorëve të linjave, vendi i ri nuk plotëson kushtet minimale për të funksionuar si terminal autobusësh. Ata shprehen se mungojnë tualetet, nuk ka strehë për udhëtarët në rast shiu apo temperaturash të larta, si dhe nuk ofrohen kushte sigurie për punën e përditshme.
“Ky nuk është një stacion i mirëfilltë, por një ndalesë anës rrugës. Në këto kushte është e pamundur, këtu është burim aksidenti”, deklarojnë protestuesit.
Një tjetër shtoi: “Stacioni ku na ka caktuar kryetarja e Bashkisë, është stacioni më mizerabël që nuk plotëson kushtet më minimale. Po ta shikoni, edhe koshat e mbeturinave i kanë vendosur sot në mëngjes.”
Nga ana tjetër, zhvendosja e autobusëve synon t’i japë fund problematikave të mëparshme në qytet, ku mjetet parkoheshin në pika të ndryshme, duke krijuar vështirësi për qytetarët dhe mungesë organizimi për transportin interurban. Mungesa prej vitesh e një terminali të mirëfilltë ka qenë një nga çështjet më të diskutuara në qytet.
Pritet që në vijim të ketë reagim zyrtar nga autoritetet vendore lidhur me kërkesat e transportuesve dhe mundësinë e përmirësimit të kushteve në pikën e re të vendqëndrimit.