Policia e Krujës ka zbuluar një tjetër arsenal armësh zjarri, armësh shpërthyese dhe municionesh luftarake. Ato dyshohet se i përkasin Ylli Zallës, 49-vjeçarit, i cili u shpall në kërkim pas atentatit të Rinasit po për armëmbajtje pa leje.
Ai dyshohej se ka ndihmuar autorët që kryen atentatin ndaj Gilmando Danit dhe Muçi Shaljanit, por mesa duket kishte ngritur një “magazinë” të tërë me armë.
Zalla i kishte vendosur armët në tokë afër banesës. Siç duket nga pamjet u desh edhe qeni i policisë për të gjurmuar armët.
Në total u sekuestruan:
-24 kallëpe tritoli, 11 granata dore sulmuese, sasi lëndësh plasëse gati për shpërthim, të montuara me kapsolla detonatore, fitila zjarrpërcjellës, 5 ndezës granatash, 74 kapsolla detonatore, 19 mbështjellje sferike C4, 11 kallëpë dinamiti;
-27 djegore;
-3 armë zjarri, krehra dhe pjesë armësh;
-2 silenciatorë, 9000 fishekë të kalibrave të ndryshëm;
-6 kg lëndë e dyshuar narkotike Cannabis Sativa;
-uniforma policie dhe sende të tjera të kundërligjshme.
“Në vijim të veprimeve procedurale për rastin, u shpall në kërkim shtetasi Y. Z., 49 vjeç, i cili nga hetimet e para dyshohet se është poseduesi i tyre”, njoftoi policia.
Kujtojmë se më 14 nëntor të vitit të kaluar, policia kreu një operacion në fshatin Zall të Niklës ku gjeti në një banesë të Zallës granata, tritol, mina, automatikë, pushkë, fishekë dhe kanabis.
Sipas informacioneve, rezulton që 49-vjeçari të ketë një “kartelë të pasur” me problematika të ndryshme me ligjin.
Zalla është arrestuar më herët po për posedim të municioneve luftarake dhe lëndëve plasëse. Po ashtu rezulton i skeduar edhe për rekrutim të shqiptarëve që i kanë dërguar për të luftuar me ISIS-in. Ndërsa disa vite më parë Ylli Zalla ka kërcënuar pronarin e një fabrike në Fushë Krujë.
Sa i përket lidhjes së tij me atentatin në Rinas dyshohet se Ylli Zalla ka ndihmuar autorët në ngjarjen e rëndë që ndodhi më 11 nëntor.
Më konkretisht, dyshohet se ai ka furnizuar atentatorët e Rinasit. Njëkohësisht hetuesit dyshojnë se nga banesa në fjalë ka dalë automjeti i përdorur në atentat një makinë tip “Toyota” që u dogj në fshatin Halil.