Kryeministrja e Italisë, Giorgia Meloni, mbajti një fjalim në Senatin e Italisë gjatë komunikimeve të saj para mbledhjes së ardhshme të Këshilli i Bashkimit Evropian, ku trajtoi disa çështje të rëndësishme, përfshirë krizën në Lindjen e Mesme dhe politikën e emigracionit. Në fjalimin e saj, ajo u ndal edhe tek marrëveshja për transferimin e emigrantëve drejt Shqipërisë dhe debatet që janë krijuar rreth kësaj nisme.
Meloni theksoi se qeveria italiane nuk është as “bashkëfajtore dhe as e izoluar” në politikat e saj për emigracionin, duke shtuar se Italia ka të drejtë të zbatojë masa për të kontrolluar flukset migratore dhe për të garantuar sigurinë e vendit. Sipas saj, qeveria ka vepruar gjithmonë në përputhje me ligjin ndërkombëtar dhe atë europian.
Një pjesë e fjalimit të saj iu kushtua vendimeve të disa gjykatave italiane, që kanë revokuar transferimin e disa emigrantëve drejt qendrave të pritjes jashtë territorit italian, përfshirë edhe qendrat që parashikohen të funksionojnë në Shqipëri. Kryeministrja italiane kritikoi këto vendime, duke thënë se ato nuk gjejnë justifikim në ligjin italian, në atë europian dhe as në logjikën e thjeshtë.
Ajo përmendi edhe raste konkrete të emigrantëve të paligjshëm, që sipas saj janë dënuar për vepra penale të rënda, si trafik droge, rezistencë ndaj forcave të rendit dhe dhunë seksuale, përfshirë edhe raste të dhunës seksuale ndaj të miturve. Megjithatë, sipas Melonit, këta persona nuk mund të mbahen apo të riatdhesohen, sepse kanë bërë kërkesa për mbrojtje ndërkombëtare.
“Është shumë e trishtueshme të tregosh se edhe persona të akuzuar për krime të rënda arrijnë të shmangin transferimin apo ndalimin vetëm sepse paraqesin në mënyrë instrumentale një kërkesë për azil”, tha ajo para senatorëve.
Meloni u shpreh gjithashtu se institucionet europiane e kanë bërë të qartë se mekanizmi i krijuar nga Italia për funksionimin e qendrave të emigrantëve jashtë territorit italian, përfshirë ato në Shqipëri, është në përputhje me të drejtën europiane dhe atë ndërkombëtare.
Sipas saj, dokumentet e Bashkimit Europian e konfirmojnë se Italia ka të drejtë të vërë në funksion këto qendra, të cilat synojnë të menaxhojnë më mirë emigracionin e paligjshëm dhe të përshpejtojnë procesin e shqyrtimit të kërkesave për azil. Megjithatë, kryeministrja italiane tha se edhe pse kjo mbështetje ekziston në nivel europian, ajo druhet se disa gjykata do të vazhdojnë të nxjerrin vendime që bllokojnë transferimin e emigrantëve drejt qendrave në Shqipëri.
Debati mbi marrëveshjen mes Italisë dhe Shqipërisë për menaxhimin e emigrantëve ka qenë një nga temat më të diskutueshme në politikën italiane gjatë muajve të fundit. Marrëveshja parashikon që një pjesë e emigrantëve të shpëtuar në det nga autoritetet italiane të dërgohen në qendra të posaçme në Shqipëri, ku do të shqyrtohen kërkesat e tyre për azil.