Ministri i Mbrojtjes, Ermal Nufi, përshëndeti sot 77-vjetorin e themelimit të NATO, duke e cilësuar aleancën si strukturën më të madhe dhe më të fuqishme të sigurisë dhe paqes në botë.
Në një postim në rrjetet sociale, Nufi theksoi se që prej vitit 1949, NATO ka qenë garancia më e fortë e lirisë, sigurisë dhe mbrojtjes kolektive për vendet anëtare, duke dëshmuar se uniteti dhe solidariteti mbeten themeli i paqes së qëndrueshme.
Sipas tij, në një kontekst global që ndryshon me ritme të shpejta dhe përballet me sfida të reja të sigurisë, Aleanca mbetet e palëkundur në misionin e saj për të mbrojtur vlerat demokratike dhe për të garantuar sigurinë e çdo vendi anëtar.
“77 vite, 32 kombe, 29 gjuhë, një qëllim i përbashkët, një Aleancë: NATO”, u shpreh ministri, duke vënë në dukje rëndësinë e bashkëpunimit dhe kohezionit ndërmjet aleatëve.
Shqipëria është anëtare e NATO-s që prej vitit 2009 dhe vijon të kontribuojë në misionet dhe operacionet e Aleancës në funksion të paqes dhe sigurisë ndërkombëtare.