Shkolla e mesme “Kolë Idromeno” në Shkodër është rindërtuar plotësisht dhe tashmë është gati të hapë dyert për nxënësit, duke ofruar kushte moderne për zhvillimin e procesit mësimor.
Objekti i ri arsimor përfshin ambiente bashkëkohore, laboratorë të pajisur dhe terrene sportive, të cilat do të jenë në dispozicion të rreth 400 gjimnazistëve.
Lajmi u bë i ditur nga kryeministri Edi Rama përmes një postimi në rrjetet sociale, ku ai ndau edhe pamje nga transformimi i shkollës. Në mesazhin e tij, Rama theksoi se ky investim sjell përmirësimin e kushteve të arsimit dhe afrimin e tyre me standardet europiane.
