Kryeministri Edi Rama, do të zhvillojë sot një vizitë zyrtare në Itali, ku do të takohet me homologen e tij italiane, Giorgia Meloni.
Sipas njoftimit zyrtar të qeverisë italiane, takimi do të zhvillohet në selinë e Kryeministrisë në Romë, në “Palazzo Chigi”, dhe është planifikuar të nisë në orën 15:00.
“Ditën e enjte, më datë 16 prill, kryeministrja Meloni do të zhvillopjë një takim me kreun e qeverisë së Shqipërisë Edi Rama në Palazzo Chigi”, thuhet në njoftimin e qeverisë së Romës.
Rama dhe Meloni njihen për marrëdhëniet e ngushta dhe bashkëpunimin e vazhdueshëm mes dy vendeve në fusha të ndryshme me interes të përbashkët.
Në nëntor të vitit të kaluar, Shqipëria dhe Italia mbajtën një mbledhje të përbashkët ndërqeveritare, të cilën të dy liderët e cilësuan si historike.
“Një ditë historike, sepse për herë të parë qeveria shqiptare ulet me qeverinë italiane për të folur për projekte të përbashkëta dhe për të folur për një të ardhme të përbashkët”, kishte deklaruar Rama.
Në atë kohë, Tirana dhe Roma zyrtare nënshkruan plot 16 marrëveshje të përbashkëta bashkëpunimi. Rama tha se “qershia mbi tortë” nga Italia do të vijë në vitin 2028, kur fqinjët do të marrin kryesinë e Këshillit Europian. Sipas kryeministrit shqiptar, vendi fqinj do e ndihmojë Shqipërinë për anëtarësim në BE dhe se në krye të shtetit italian do të jetë sërish Meloni.
Georgia Meloni po ashtu shprehu gatishmërinë e plotë për bashkëpunim mes dy shteteve.