Në gjyqin për vrasjen e Liridona Ademajt, ka rrëfyer edhe vëllai i saj, Leonardi.
Ai u shpreh se këtë vrasje e ka organizuar Naim Murseli me Kushtrim Kokallën, duke e gjetur Granit Plavën si vrasës.
Ai gjithashtu shtoi se këtë gjyq po e ndjekin edhe fëmijët e Liridonës, të cilët do të kërkojnë drejtësi për nënë e tyre.
Fjala e plotë e Leonard Ademajt:
Po bëhen gati tre vite që nga vrasja e Liridonës, më kujtohet si sot arrestimi i të akuzuarve.
Për ne si familje nuk ishte e lehtë kjo periudhë tre vjeçare, e kemi gjetur besimin dhe kemi heshtur në shumë momente që ndoshta nuk është dashur të heshtim.
Në këtë ditë kur do të flasim të gjithë që ishim palë, një gjë është e qartë, që Naimi e ka organizuar këtë vrasje së bashku me Kushtrimin, duke e gjetur Granitin si vrasës.
Në së paku 22 kamera janë kapur Naimi, Graniti, Kushtrimi. Nuk dua t’i citoj disa deklarata të tyre. Në deklaratat e dhëna Kushtrimi thotë: “Naimi më ka thënë një vit para ta vras Liridonën”, Kushtrimi thotë: “kur jemi takuar me Naimin e Granitin, Naimi i thotë Granitit ti po kryjshe punë”. Kushtrimi thotë: “natën kritike pasi kemi arritur në Zvicër, shyqyr e kryva këtë punë”, Kushtrimi thotë pasi Naimi e ka pa policinë duke ardhur në ditën e varrimit më ka pyetur për armën.
Ndërsa Naimi deklaron kështu: “kam qenë keq mentalisht kur Liridona e ka kuptuar tradhtinë që ia kam bë”, Naimi thotë me Kushtrimin kam qenë gjithë kohës, i thotë dëshmitarit Valon Llukës, prokurorja më ka bë pyetje si me e pas vra unë Liridonën.
Pra, Kuqa është Kushtrimi, të gjithë e thirrin kështu.
I nderuar trup gjykues, ne si popull kemi kaluar sakrifica, por na ka bashkuar një tragjedi dhe ajo është lufta me gruan, për 16 vite janë vra 59 gra. Asnjë prej familjeve nuk ka kërkuar ngjarjen e atyre që na i kanë vra por kemi kërkuar drejtësi.
Kuptohet se kush e gjeti vrasësin e kush e organizoi krimin, këtu është shumë e qartë që Naimi ka kërkuar të vrasë Liridonën.
Pa Naimin nuk ka Kushtrim, pa Kushtrimin nuk ka Granit, pa Granitin nuk do kishte vrasje.
Përveç neve, këtë proces do e shohin edhe fëmijët e Liridonës, do kërkojnë drejtësi për nënën e tyre, kur të shohin këtë proces nuk do brengosen sepse dikush e ka vënë drejtësinë në vend.
Ata do të rriten dhe do të falënderojnë secilin, policinë, prokurorinë, gjykatën që vrasjen makabre të nënës së tyre e zbuluan dhe kriminelët u dënuan.
Pas më shumë se tetë muajve nga vrasja e Liridonës ishte takimi i parë që kisha me ta, nuk e dinim se si e kanë përjetuar vrasjen e nënës së tyre, pas takimit, ata ishin kundër babait të tyre, e sot tetë vjet pas, ende nuk flasin.
Ditën e vrasjes së Liridonës, me të iku edhe gjysma e shpirtit dhe jetës tonë, na ka mbetur edhe gjysmë jete që duhet ju të vendosni se a duhet të jetojmë me frikë apo të sigurt. Kërkojmë burgim të përjetshëm, çdo vendim tjetër e cenon Liridonën, vetëm vuajtja e dënimit nga ta e lehtëson dhimbjen tonë.