Kryeministri shqiptar Edi Rama ka publikuar sot në 23 prill një foto-album nga vizita e tij në Athinë gjatë ditës së djeshme.
Kreu i qeverisë ka ndarë fotografi nga takimi miqësor që pati me homologun grek, Kyriakos Mitsotakis, nga Forumi Ekonomik i Delphi-t dhe nga takimi që ka pasur me shqiptarë që jetojnë në vendin fqinj.
“Mirëmëngjes dhe me foto-albumin e një dite të ngrohtë në Athinë e në Delphi, ku mbrëmja u mbyll përmes një rruge, ku u mblodhën si me magji plot shqiptarë, ju uroj një ditë të mbarë”, shkruan Rama në rrjetet sociale.
Gjatë ditës së djeshme, kryeministri në Forumin e Delphi-t u shpreh se Shqipëria nuk ka qenë kurrë kaq pranë anëtarësimit në Bashkimin Europian.
I pyetur se përse nga vendi janë larguar 500 mijë shqiptarë gjatë qeverisjes së tij, përgjigja e Ramës ishte kjo: “Nuk është shifër e saktë, por po, shqiptarët kanë vazhduar të largohen dhe mendoj se është normale për një vend që ka kaluar 50 vjet izolimi të plotë”, u përgjigj kryeministri.
Më tej, ai foli me shifra sa i takon rritjes ekonomike, duke u ndalur te prodhimi i brendshëm bruto, investimet e huaja e deri te rritja rekord e numrit të turistëve.
Vlerësoi maksimalisht raportin mes Shqipërisë e Greqisë, teksa sqaroi edhe ngërçin me pronat.
“Problemi me pronën edhe në zonat ku ka qytetarë etnikë grekë nuk është aspak ndryshe nga problemet që kanë qytetarët shqiptarë në të njëjtën zona apo kudo tjetër. Është thjesht një problem shqiptar, që po e trajtojmë! Për shkak se kemi një nivel mjaft të rëndësishëm të kuptuari e respekti për pakicën greke, që është një thesar kulturor, ne ju kemi kushtuar vëmendje të posaçme. Këtu dua të përgëzoj Mitsotakis, që ka qenë vërtet këmbëngulës për këtë. Ju jeni në krye të një gazete të madhe, ata mund të vijnë dhe të marrin informacione, do të ishte me vlerë nëse bëni një raportim të saktë me fakte që do ua vëmë në dispozicion”, deklaroi Rama.