Gjykata e Posaçme AntiKorrupsion (GJKKO) ka shpallur të pafajshëm ish-Shefin e Policisë Rrugore në Tiranë, Roven Zeka. Ky i fundit akuzohej për “korrupsion pasiv”, vepër penale që nuk është provuar ta ketë kryer.
Siç raporton gazetarja e Klan News, Glidona Daci, për të pandehurit e tjerë janë dhënë këto masa dënimi:
Edison Tabaku (oficeri i policisë gjyqësore) është dënuar me 3 vite burg, me gjykimit të shkurtuar reduktohet në 2 vite burg
Sokol Navaku (Ish-Shefi i hetimit të aksidenteve) është dënuar gjithashtu me 3 vite burg, që me gjykim të shkurtuar reduktohet në 2 vite, dënim i cili është konvertuar në shërbim prove.
Shtetasi E.G., është dënuar me 1 vit e 6 muaj burg, që me gjykim të shkurtuar reduktohet në 1 vit burg, duke u konvertuar në shërbim prove për një periudhë 2-vjeçare
Shtetasi B.B., është shpallur fajtor për veprën penale të “moskallëzimit të krimit” dhe është dënuar me 1 vit burg, që me gjykim të shkurtuar reduktohet në 8 muaj, dënim i konvertuar në shërbim prove
Zeka dhe dy vartësit e tij u arrestuan me udhër të SPAK në prill të vitit të shkuar, të dyshuar për korrupsion pasiv. Sipas Prokurorisë së Posaçme, dyshohej se ata i kishin marrë një shumë parash një gruaje, e cila ishte përfshirë në një aksident rrugor me pesë të plagosur në kryeqytet, ngjarje e ndodhur më 16 prill 2025. SPAK argumentonte asokohe se oficerët e policisë rrugore i kishin kërkuar familjarëve të drejtueses së automjetit pagesën prej 2 mijë eurosh.
Në korrik të 2025-ës, Zeka fitoi lirinë për arsye shëndetësore, pasi dëmtoi legenin në qeli. Jo më larg se para dy muajsh, Prokuroria e Posaçme relatoi konkluzionet përfundimtare mbi çështjen, duke kërkuar dënimin me 4 vite heqje lirie për ish-Shefin e Qarkullimit Rrugor.