Kris Jenner ka pranuar publikisht se ka provuar Ozempic për humbje peshe, por eksperienca rezultoi shumë më e vështirë nga sa priste.
Në një podcast të fundit, matriarkja e familjes Kardashian tregoi se ilaçi, i cili është bërë jashtëzakonisht popullor mes personazheve të famshëm, i shkaktoi efekte anësore të forta dhe e detyroi të ndalonte përdorimin e tij.
“E provova një herë, në kohën kur askush nuk e dinte çfarë ishte, dhe më bëri shumë keq. Kisha të përziera dhe nuk mund të funksionoja normalisht”-u shpreh ajo.
Sipas Jenner, situata ndikoi aq shumë sa nuk arrinte as të punonte, kështu vendosi të kërkonte alternativa të tjera bashkë me mjekët e saj.
Ajo tregoi se më pas kaloi te peptidet e injektueshme, të cilat, sipas saj, funksionuan shumë më mirë për organizmin e saj. Jenner tha se i kombinon ato me vaj peshku dhe suplemente omega-3.
“Kjo ndryshoi gjithçka për mua. Madje më ndihmoi edhe me gjumin, sepse zakonisht zgjohem shumë herët”-theksoi ajo.
Ekspertët kanë paralajmëruar vazhdimisht se përdorimi i peptideve dhe trajtimeve të ngjashme duhet bërë me kujdes dhe vetëm nën mbikëqyrje të rreptë mjekësore, pasi disa prej tyre nuk janë studiuar plotësisht dhe mund të shkaktojnë efekte anësore serioze tek individët, nga problemet me stomakun deri te pankreatiti.