Kandidati i përjashtuar nga gara në PD Ervin Salianji i drejtohet me një letër grupimit të Partive Popullore Europiane, ku shpreh shqetësimin për bllokimin e garës për kryetar, mosrespektimin e statutit të partisë dhe përjashtimet arbitrare të kandidatëve. Salianji thotë se në PD po asgjësohen standardet demokratike dhe pluralizmi i brendshëm.
Salianji thekson se: “Çështja nuk është një kandidim individual, por mbrojtja e standardeve demokratike, pluralizmit të brendshëm dhe kredibilitetit institucional të partisë më të madhe opozitare në Shqipëri.”
Në komunikimin drejtuar PPE-së dhe liderëve të partive simotra europiane, ai nënvizon se Partia Demokratike, si pjesë e familjes politike europiane, duhet të jetë model i demokracisë së brendshme dhe jo simbol i mbylljes, përjashtimeve dhe interesave personale.
Në letër evidentohet gjithashtu fakti se kandidaturat për garën e brendshme u penguan në mënyrë faktike, zyra përgjegjëse për dorëzimin e dokumentacionit nuk funksionoi brenda afatit;
mbështetës dhe kandidatë u përjashtuan pa vendime formale dhe pa argumentim statutor, nuk u respektua neni i statutit që parashikon dorëheqjen e kryetarit pas humbjes së zgjedhjeve parlamentare.
Salianji kërkon nga PPE dhe drejtuesit e partive të djathta europiane një angazhim parimor dhe konstruktiv për të inkurajuar dialogun, respektimin e normave statutore dhe ruajtjen e standardeve demokratike brenda Partisë Demokratike të Shqipërisë. Ai rithekson në fund të letrës angazhimin e tij për vlerat europiane, demokracinë, shtetin e së drejtës, pluralizmin dhe integrimin europian të Shqipërisë.
Nga ana tjetër vetë Berisha dukej jo pak i shqetësuar për këtë letër, në konferencën për mediat ai tha se Salianji mund të cojëletra sa të dojë, është i vetëpërjashtuar.
“Ai që shkruan letër është një i vetëpërjashtuar nga kjo parti. Por ai natyrisht ka të drejtat e tij, mund të shkruajë letra ku të dojë, është i lirë. Sikundër është i lirë t’i drejtohet organeve të partisë, gjykatës së partisë, ku të shprehë ankesën, megjithëse ai u vetëpërjashtua, zgjodhi vetë vetëpërjashtimin” tha Berisha.