Çmimet e biletave për Botërorin 2026 po shkaktojnë debat të madh mes tifozëve, pasi turneu në SHBA, Kanada dhe Meksikë pritet të jetë një nga më të shtrenjtët në histori. Sipas raportimeve, FIFA ka përdorur një model çmimesh të ndryshueshme, ku kostoja mund të rritet në varësi të kërkesës dhe disponueshmërisë së biletave. Biletat më të lira janë prezantuar nga rreth 60 dollarë, ndërsa për finalen çmimet e kategorive më të larta kanë arritur në mijëra dollarë.
Emisioni “Your Morning” në CTV ka zbuluar edhe çmimet më të frikshme: Në Toronto bileta për një ndeshje do të kushtojë mesatarisht 1 mijë dollarë. Në Nju Jork raportohet çmimi më i lartë, rreth 1,700 dollarë. Më pas vjen Guadalahara me 1,500 dollarë për një biletë. Pas nuk mbeten as Dallas apo Denver me mbi 1,300 dollarë.
Por sikur të mos mjaftonin vetëm çmimet e biletave, vendasit raportojnë se tashmë ka nisur edhe rritja e çmimeve të hoteleve.
Kritikat janë shtuar sidomos për ndeshjet më të kërkuara dhe finalen, ku disa raporte flasin për rritje të ndjeshme të çmimeve në fazat e shitjes. FIFA thotë se çmimet përshtaten sipas kërkesës dhe disponueshmërisë, ndërsa tifozët dhe disa zyrtarë e shohin këtë si një barrë të rëndë financiare për publikun.