Ministri i Infrastrukturës dhe Energjisë, Enea Karakaçi deklaroi sot se qeveria do të vijojë mbështetjen për sektorin e transportit, ndërsa paralajmëroi takime të reja me shoqatat për të vlerësuar ecurinë e çmimeve të karburanteve dhe nevojën për masa të mëtejshme.
Në konferencën e sotme për shtyp duke folur për kërkesat e Shoqatave të Transportit, Karakaçi tha se Këshilli i Ministrave miratoi dy javë më parë subvencionimin me 50 lekë për litër.
Lexo edhe :
[custom-related-posts]“Ky subvencionim erdhi edhe si rrjedhojë e bisedimeve me ministren e Ekonomisë dhe Inovacionit, Delina Ibrahimaj, por edhe ministrit të Financave, Petrit Malaj me Shoqatat e Transportit lidhur me masat menaxhuese dhe mbështetëse, që mund t’i jepeshin dhe mund të jepen për subjektet dhe grupet e interesit për shkak të rritjes së çmimeve të naftës”, vuri në dukje Karakaçi.
Ne, vijoi Karakaçi, u angazhuam që kjo masë mbështetëse të ishte 50 lekë për litër, e cila u miratua.
“Gjithashtu u angazhuam që pavarësisht kohës së miratimit që u miratua në maj si masë mbështetëse ne do e kishim fillimin e aplikimit që nga muaji mars. Ajo çfarë mund të them në këtë moment është që patjetër ne do ulemi përsëri me Shoqatat e Transportit. Do shikojmë si do vazhdojnë dinamikat e kësaj situate dhe në ditët e para të qershorit, pasi të shikojmë që ka një relaksim të çmimeve në bursa, por edhe në pikat fundore të karburanteve”, nënvizoi ministri.
Megjithatë, tha Karakaçi, situata është shumë dinamike dhe e ndryshueshme dhe patjetër do t’i gjendemi pranë shoqatës së transportit për çdo kërkesë që do të ketë.