Zëvendëskryeministri dhe ministri i Jashtëm i Belgjikës, Maxime Prévot, vlerësoi progresin e Shqipërisë në procesin e integrimit europian, ndërsa konfirmoi se Belgjika do të hapë ambasadën e saj në Tiranë, si një sinjal i rëndësisë së marrëdhënieve dypalëshe mes dy vendeve.
Në një reagim të publikuar në rrjetin social X, pas takimit bilateral me ministrin për Evropën dhe Punët e Jashtme, Ferit Hoxha, Prévot shprehu kënaqësinë për pritjen e diplomatit shqiptar në Bruksel.
Gjithashtu ai theksoi se, miratimi i IBAR është një arritje e jashtëzakonshme për Shqipërinë
“Jam i kënaqur të mirëpres Ministrin e Jashtëm të Shqipërisë Ferit Hoxha në Bruksel, një mik dhe një ish-diplomat që e njeh shumë mirë këtë qytet nga vitet e tij si Ambasador këtu. Dhe për fat të keq i njohur me shirat tipikë belgë!”, shkruan Prévot
Prévot e cilësoi hapjen e ambasadës belge në Tiranë si një tregues të qartë të vlerësimit që Belgjika i kushton marrëdhënieve me Shqipërinë.
“Patëm një takim plot lajme të mira. Belgjika do të hapë një ambasadë në Tiranë, një sinjal i qartë i rëndësisë që i kushtojmë marrëdhënies sonë. Dhe vetëm javën e kaluar, Shqipëria u bë vendi i dytë kandidat i BE-së që mori IBAR, duke hyrë në fazën përfundimtare të negociatave të anëtarësimit. Kjo është një arritje e jashtëzakonshme dhe për të cilën e përgëzojmë ngrohtësisht Shqipërinë”, theksoi ai.
Ai nënvizoi se Belgjika inkurajon Shqipërinë të vijojë reformat me të njëjtën vendosmëri, veçanërisht në fushën e sundimit të ligjit, pavarësisë së gjyqësorit dhe luftës kundër korrupsionit.
“Belgjika e inkurajon Shqipërinë të vazhdojë në këtë rrugë me të njëjtën vendosmëri, veçanërisht në sundimin e ligjit, pavarësinë gjyqësore dhe luftën kundër korrupsionit. Rruga drejt anëtarësimit bazohet në meritë dhe Shqipëria po dëshmon se mund të japë rezultate”, shtoi ai.
Sipas Prévot, në takimin bilateral u diskutua edhe mbi forcimin e bashkëpunimit mes dy vendeve në drejtësi, polici dhe luftën kundër krimit të organizuar, si dhe mbi rolin konstruktiv të Shqipërisë për stabilitetin rajonal në Ballkanin Perëndimor.
“Diskutuam gjithashtu bashkëpunimin tonë dypalësh në drejtësi, polici dhe luftën kundër krimit të organizuar, si dhe rolin konstruktiv të Shqipërisë në stabilitetin rajonal. Ballkani Perëndimor është në krye të axhendës sime. Pres me padurim të vizitoj Tiranën vitin e ardhshëm për hapjen e ambasadës sonë”, përfundon Zëvendëskryeministri dhe ministri i Jashtëm i Belgjikës, Maxime Prévot.