Një ngjarje e rëndë ka tronditur Ekuadorin, ku tetë trupa të pajetë u gjetën brenda qeseve plastike në një zonë bregdetare në jugperëndim të vendit.
Sipas policisë, trupat u zbuluan në periferi të qytetit Babahoyo, rreth 60 kilometra në jug të qytetit portual Guayaquil, një nga zonat më të prekura nga aktiviteti i grupeve kriminale të përfshira në trafikun e drogës.
Autoritetet dyshojnë se viktimat mund të jenë tetë persona të raportuar të zhdukur që prej së dielës. Shumica prej tyre besohet se i përkisnin së njëjtës familje.
Ministri i Brendshëm i Ekuadorit, John Reimberg, bëri të ditur se pranë trupave u gjet një mesazh ku përgjegjësinë për krimin e merrte grupi kriminal “Los Lobos”, në kuadër të konfliktit të përgjakshëm me rivalët e tyre, “Los Choneros”.
Të dyja organizatat konsiderohen ndër grupet më të fuqishme kriminale në vend dhe janë të përfshira në trafik droge, zhvatje dhe aktivitete të tjera të paligjshme. Sipas autoriteteve, ato kanë lidhje edhe me kartele ndërkombëtare, veçanërisht meksikane.
Ekuadori është kthyer vitet e fundit në një nga korridoret kryesore të trafikut të kokainës nga Kolumbia dhe Peruja drejt tregjeve ndërkombëtare përmes porteve të tij në Oqeanin Paqësor.
Dhuna në vend vazhdon të përshkallëzohet. Sipas të dhënave zyrtare, vetëm gjatë tre muajve të parë të vitit 2026 janë regjistruar rreth 1.600 vrasje të dhunshme.
Në vitin 2025, Ekuadori shënoi nivelin më të lartë të vrasjeve në Amerikën Latine, me 51 vrasje për çdo 100 mijë banorë, sipas organizatës InSight Crime.
Përballë përkeqësimit të situatës së sigurisë, presidenti Daniel Noboa ka shpallur masa të jashtëzakonshme kundër krimit të organizuar, duke vendosur edhe ndalim qarkullimi gjatë natës në disa provinca të vendit, përfshirë kryeqytetin Quito.
Ndërkohë, në fund të muajit maj, Ekuadori, Argjentina, Bolivia, Peruja dhe Kili njoftuan se do të hartojnë një plan të përbashkët për të luftuar përhapjen e krimit të organizuar ndërkombëtar në rajon.