Partia Socialiste dega Elbasan feston sot 35-vjetorin e themelimit. Me qindra socialistë janë mbledhur në Pallatin e Sportit të qytetit, për të kujtuar këtë ditë të veçantë për këtë forcë politike.
Në takim merr pjesë kryeministri Edi Rama, drejtuesi politik i qarkut të Elbasanit, Arbjan Mazniku, deputetë dhe ish-funksionarë të lartë të PS-së së këtij qarku.
“PS ka qenë vazhdimisht në anën e duhur të historisë. PS sa herë që ka qenë në një moment kyç, ka qenë forca që dikush shkatërronte dhe PS më pas do të duhet të ndërtonte. Unë besoj se forca reale e PS-së është se PS është si puna e një peme. Shumëkush i sheh gjethet, disa njerëz i shohin trungun, por jo shumëkush sheh që PS forcën e vërtetë e ka te rrënjët e saj, te rrënjët e strukturës, te socialistët e thjeshtë. Prandaj sot jemi në një moment që mund të shohim jo vetëm një të shkuar, por edhe një të ardhme, që është integrimi në BE”, tha mes të tjerash Mazniku.
Gjatë eventit u ndanë certifikata mirënjohje për personalitete të kësaj force politike, që kanë kontribuar ndër vite për Partinë Socialiste.
Takimi i Ramës në Elbasan vjen pak përpara se në Tiranë të zhvillohet protesta qytetare që kundërshton ndërtimin e një resorti në Zvërnec të Vlorës.