Kryeministri Edi Rama, ka reaguar përmes platformës X lidhur me protestën që po zhvillohet në vend. Rama ka akuzuar aktorë të huaj dhe grupe të ndryshme se po e shndërrojnë një kauzë mjedisore në një përplasje politike kundër qeverisë.
Në postimin e tij, Rama shkruan se edhe qeveria iraniane i është bashkuar zyrtarisht protestës, duke përdorur sipas tij të njëjtat parulla në gjuhën shqipe si grupet që kërkojnë rrëzimin e qeverisë.
“Ja edhe qeveria e ajatallohëve të Teheranit i bashkohet zyrtarisht protestës, madje edhe me parrullat në shqip njësoj si ata që e kthyen nga protestë mjedisore në protestë për rrëzimin e qeverisë”, shkruan Rama.
Sipas kryeministrit, pasojat mund të reflektohen drejtpërdrejt në ekonomi, duke ndikuar në tërheqjen e investimeve të huaja dhe në ritmin e zhvillimit të turizmit.
Kryeministri Edi Rama në platformën X:
Ja edhe qeveria e ajatallohëve të Teheranit i bashkohet zyrtarisht protestës, madje edhe me parullat në shqip njësoj si ata që e kthyen nga protestë mjedisore në protestë për rrëzimin e qeverisë!
Bashkëngjitur replika ime edhe në emrin e atyre protestuesve që janë akoma aty për të mbrojtur natyrën, jo për ta bërë Shqipërinë shesh për përsheshet e fuqive lloj-lloj, nga mesjetarët iranianë, që e duan të djegur këtë oaz shembullor të tolerancës ndërfetare e të marrëdhënieve të shkëlqyera qoftë me Izraelin, qoftë me vendet arabe apo Turqinë, tek grupime lloj-lloj e media ndërkombëtare bashkë me lloj-lloj individësh nga lloj-lloj vendesh, që dufin me Trump po e nxjerrin këto ditë duke i përmbytur rrjetet sociale me lloj-lloj gjysmë të vërtetash, të cilat fryhen e fryhen duke u bërë gënjeshtrat më të mëdha!
Shqipëria është shumë e vogël për të rënë në këtë kurth të madh, nga ku rrezikojmë të kthehemi me këmbët tona në pikën që të mos afrohet më asnjë investitor i huaj, ndërsa turizmi të mbetet shumë mbrapa krahasimisht me konkurrentët tanë, duke na dënuar me qëndrimin në kategorinë e dytë për kushedi sa vjet të tjera…