Dosja 339 është dosja më e madhe në historinë e Prokrurorisë Shqiptare është shprehur kreu i Prokurorisë për Krimet e Rënda, Donika Prela në një dalje të posaçme për shtypin pas publikimit të përgjimeve nga gjermania “Bild”.
Mjaft e kujdesur përsa i përket cënimit të lirisë së medias, Prela tregoi se çfarë po ndodh aktualisht me dosjen. Sipas saj hetimet për korrupsion zgjedhor kanë nisur vetëm në tetor 2018, kur Prokuror të çështjes u caktuan Vladimir Mara dhe Dritan Prençi.
Anton Martini ka qenë prokurori i parë që ka marrë në dorë çështjen në 2017 dhe kanë qenë vetëm për akuzat e trafikut të drogës dhe jo për zgjedhjet. Çështja më pas kaloi në dorën e prokurorit Hajdarmataj e më pas Mara dhe Prençi.
“Në kuadër të hetimeve sqarojnë se janë administruar 624 CD me përgjime dhe 150 DVD. Nga këto janë 110 CD për 2017, 479 për 2018, dhe 35 CD për 2019. Sqarojmë se referuar informacionit që më është vënë në dispozicion në momentin e ngritjes së grupit hetimor, tetor 2018 të gjitha CD e administruara kanë qenë të patranskriptuara po kanë pasur transkripte të pjesshme vetëm të disa nr të veçantë dhe sporadike, po kështu në këtë moment është konstatuar se janë bërë hetime të hapura vetëm për trafikim të lëndëve narkotike dhe abuzime me pronat në zonën e Lezhës. Ndërsa për vepra të tjera penale, si në fushën e zgjedhjeve, nuk ka pasur hetime të hapura me përjashtim të përgjimeve që nuk kanë qenë të transkriptuara në tërësi. Duke parë rëndësinë e veprës dhe numrin e madh të personave në hetim sqaroj se aktualisht numri ka arritur në 74 persona, dosja më e madhe që ka patur prokuroria në historinë e saj”, tha Prela.