Bisedimet e planifikuara mes Shteteve të Bashkuara dhe Iranit në Zvicër nuk do të zhvillohen, pasi anulimi i tyre u njoftua në momentet e fundit nga autoritetet zvicerane. Sipas raportimeve, Teherani vendosi të tërhiqet nga takimi për shkak të vazhdimit të sulmeve ushtarake izraelite në Liban.
Takimi, i parashikuar për 19 qershor, kishte për qëllim diskutimin e zbatimit të një marrëveshjeje 14-pikëshe për t’i dhënë fund konfliktit. Bisedimet pritej të mbaheshin në fshatin zviceran Aubourgen, vetëm dy ditë pas nënshkrimit të Memorandumit të Mirëkuptimit (MOU), i cili hapte një periudhë 60-ditore negociatash për një marrëveshje afatgjatë mbi programin bërthamor iranian dhe lehtësimin e transportit të naftës përmes Ngushticës së Hormuzit.
Shtëpia e Bardhë deklaroi se SHBA-ja vazhdon të presë nisjen e bisedimeve teknike sa më shpejt të jetë e mundur. Gjithashtu, u bë e ditur se JD Vance, i cili udhëheq negociatat në emër të administratës Trump, nuk do të udhëtojë drejt Zvicrës.
“Negociatat teknike nuk kanë qenë kurrë të thjeshta apo plotësisht të parashikueshme. Në këtë moment, zëvendëspresidenti nuk do të niset sonte”, deklaroi një zëdhënës i Shtëpisë së Bardhë në orët e vona të së enjtes.
Vendimi për anulimin e takimit erdhi papritur. Ekipi i Vance dhe një grup i vogël gazetarësh ndodheshin tashmë në Bazën e Përbashkët Andrews pranë Uashingtonit, në pritje të nisjes. Ndërkohë, dhjetëra zyrtarë amerikanë, anëtarë të stafit të lartë dhe përfaqësues të mediave kishin mbërritur në Zvicër për përgatitjet e vizitës.
Më herët gjatë ditës, JD Vance kishte deklaruar se kishte në plan të udhëtonte drejt Zvicrës, por se nuk mund të përcaktonte me saktësi kohën e nisjes.
“Ne besojmë se negociatat teknike do të fillojnë gjatë këtij fundjave. Ky mbetet plani aktual, megjithëse situata mund të ndryshojë”, tha ai.
Ndërkohë, Ministria e Jashtme e Iranit njoftoi se presidenti iranian e kishte nënshkruar Memorandumin e Mirëkuptimit në mënyrë elektronike, duke bërë të panevojshme ceremoninë zyrtare të planifikuar në Zvicër. Si pasojë, ceremonia u anulua, sipas mediave shtetërore iraniane.
Presidenti Trump e nënshkroi dokumentin për herë të dytë të mërkurën në mbrëmje në Pallatin e Versajës, përpara largimit nga Franca, ku kishte marrë pjesë në samitin e G7. Ai u rikthye në Shtëpinë e Bardhë në orët e para të mëngjesit të së enjtes