Shqipëria është zgjedhur anëtare e Komitetit Ndërqeveritar për Trashëgiminë Kulturore Jomateriale të UNESCO-s, për periudhën 2026-2030, duke siguruar kështu një rol në vendimmarrjet që lidhen me mbrojtjen dhe promovimin e trashëgimisë kulturore në nivel ndërkombëtar.
Ky anëtarësim e vendos vendin tonë në një pozicion aktiv për zbatimin e Konventës së vitit 2003 të UNESCO-s, si dhe për shqyrtimin e dosjeve të ndryshme që paraqiten nga shtetet anëtare.
Zëvendësministrja e Kulturës, Lira Pipa, tha se ky zhvillim rrit profilin ndërkombëtar të Shqipërisë dhe e kthen atë nga një vëzhguese në një vendimmarrëse në këtë tryezë.
Ajo theksoi se Shqipëria do të punojë për forcimin e kapaciteteve profesionale në bashkëpunim me UNESCO-n, universitetet dhe ekspertët e fushës, me qëllim rritjen e cilësisë së vlerësimit të dosjeve.
Ky anëtarësim vjen pas disa nominimeve të fundit të trashëgimisë shqiptare, përfshirë dollinë, qeleshen, Festivalin e Gjirokastrës dhe ritet e pranverës së arbëreshëve.
Institucionet shqiptare synojnë gjithashtu të vijojnë përgatitjen e dosjeve të reja për t’u përfshirë në listat e UNESCO-s, duke rritur prezencën e trashëgimisë kulturore shqiptare në nivel ndërkombëtar.
Në fokus mbetet edhe mbrojtja e trashëgimisë kulturore përballë sfidave si ndryshimet klimatike, transformimi digjital dhe ruajtja e diversitetit kulturor.