Çmimet e naftës kanë shënuar sërish rënie në tregjet ndërkombëtare, pas sinjaleve të përziera që vijnë nga bisedimet diplomatike mes SHBA-së dhe Iranit në Zvicër.
Sipas raportimeve, një fuçi naftë Brent po tregtohet rreth 79 dollarë, duke regjistruar një ulje prej rreth 1.8% krahasuar me mbylljen e së premtes. Megjithatë, çmimi mbetet ende mbi nivelet e para përshkallëzimit të konfliktit.
Rënia vjen pavarësisht tensioneve të larta politike në rajon. Palët kanë shkëmbyer deklarata të forta, ku SHBA ka paralajmëruar mundësi për përshkallëzim të konfliktit, ndërsa Irani ka ngritur shqetësime lidhur me kontrollin e Ngushticës së Hormuzit.
Ky kanal detar konsiderohet një nga pikat më strategjike në botë, pasi përmes tij kalon rreth 1/5 e furnizimit global me naftë dhe gaz. Çdo tension në këtë zonë ndikon menjëherë në tregjet ndërkombëtare të energjisë.
Ekspertët theksojnë se, ndonëse tregjet këtë herë kanë reaguar me rënie, pasiguria mbetet e lartë dhe çdo zhvillim i ri diplomatik apo ushtarak mund të ndryshojë menjëherë drejtimin e çmimeve.
Në terren, lëvizja e anijeve tregtare vijon me kujdes të shtuar, ndërsa disa operatorë po shmangin kalimin në zonat me rrezik të lartë.
Analistët paralajmërojnë se muajt në vijim mund të sjellin luhatje të forta në tregun e naftës, në varësi të ecurisë së negociatave dhe situatës në Ngushticën e Hormuzit.