Presidenti amerikan Donald Trump ka komentuar dorëheqjen e kryeministrit britanik Keir Starmer, duke e cilësuar atë si “një mik në një farë mënyre”, por njëkohësisht duke e kritikuar për politikat e ndjekura gjatë mandatit të tij.
Në një prononcim për gazetarët në Shtëpinë e Bardhë, Trump deklaroi se Starmer kishte bërë gabime të rëndësishme në fushat e energjisë, imigracionit dhe sigurisë, të cilat sipas tij kanë ndikuar në rënien e tij politike si lider laburist.
“Ai është një mik shumë i mirë, do të thoja unë – një mik në një farë mënyre”, u shpreh Trump.
Megjithatë, presidenti amerikan kritikoi edhe qëndrimin e Starmer ndaj NATO-s, duke pretenduar se kryeministri britanik “nuk ishte i mirë me ne në NATO”.
Trump shprehu gjithashtu pakënaqësi për vendimin e Starmer për të mos mbështetur operacionin ushtarak amerikan ndaj Iranit.
Sipas tij, politikat në energji dhe imigracion, së bashku me rritjen e kriminalitetit, ishin faktorët kryesorë që ndikuan negativisht në pozicionin politik të Starmer në Britani.