Anëtarët e Komisionit për Çështjet e Brendshme dhe Sigurinë po zhvillojnë një vizitë zyrtare në Ankara, ku kanë zhvilluar takime me përfaqësues të Komisionit për Çështjet e Brendshme, Komisionit për Sigurinë dhe Inteligjencën, si dhe me Grupin Parlamentar të Miqësisë Turqi–Shqipëri në Kuvendin e Madh Kombëtar të Turqisë.
Deputeti Agron Malaj, anëtar i komisionit, bëri të ditur se gjatë takimeve u diskutua për sfidat aktuale të sigurisë, luftën kundër krimit të organizuar, menaxhimin e kufijve, emergjencat civile dhe bashkëpunimin në fushën e mbrojtjes.
“Në kuadër të vizitës zyrtare në Ankara, së bashku me kolegët e Komisionit për Çështjet e Brendshme dhe Sigurinë zhvilluam takime të rëndësishme me institucionet homologe turke. Gjatë bisedimeve vlerësuam marrëdhëniet e shkëlqyera mes dy vendeve tona dhe shkëmbyem pikëpamje mbi çështje me interes të përbashkët, duke përfshirë sigurinë, luftën kundër krimit të organizuar, menaxhimin e kufijve dhe bashkëpunimin në mbrojtje”, shkruan Malaj.
Sipas tij, diplomacia parlamentare mbetet një instrument i rëndësishëm për forcimin e dialogut politik dhe institucional, ndërsa partneriteti strategjik mes Shqipërisë dhe Turqisë vijon të japë kontribut në sigurinë, stabilitetin dhe zhvillimin e rajonit.
