Franca po përballet me një nxehtësi ekstreme që ka shkaktuar deri tani dhjetëra viktima, por sikur të mos mjaftonte kjo, të tjera probleme janë shfaqur.
Mijëra shtëpi në very të vendit u goditën nga ndërprerja e energjisë elektrike, ndërsa autoritetet u përpoqën të siguronin gjeneratorë për qendrat mjekësore dhe azilet e pleqve.
Operatori I energjisë elektrike konfirmoi se incidenti lidhej me valën e të nxehtit, por fatmirësisht kjo ngjarje nuk pati pasoja.
Temperaturat rekord në të gjithë Evropën, që variojnë deri në 18 gradë Celsius mbi normalen, kanë ndërprerë edhe rrjetet e transportit dhe kanë detyruar shkollat dhe vendet turistike të mbyllen.
Agjencia e motit Meteo France ka thënë se kushtet janë të krahasueshme me një valë të nxehti në gusht të vitit 2003 që zgjati 16 ditë dhe shkaktoi rreth 80,000 vdekje në të gjithë Evropën.
Vala e nxehtësisë i ka detyruar ndërtuesit të ndryshojnë orarin e punës në mënyrë që punonjësit të shmangin më të keqen, ndërsa shitësit me pakicë përpiqen të përmbushin kërkesën për ventilatorë dhe kondicionerë portativë dhe fermerët korrin grurë natën pas një ndalimi të punës pasdite për shkak të rreziqeve nga zjarri.
Dhjetëra janë mbytur ndërsa përpiqeshin t’i shpëtonin nxehtësisë duke u hedhur në dete, lumenj apo pishina.
Autoritetet britanike të shëndetit kanë lëshuar një alarm shëndetësor të kuq për herë të dytë në histori, duke paralajmëruar për një rrezik për jetën edhe për ata që janë të shëndetshëm, si dhe për të sëmurët dhe të moshuarit.