Ekipet e kërkim-shpëtimit, të mbështetura nga qen të trajnuar posaçërisht, vijuan edhe dje operacionet për gjetjen e të mbijetuarve të fundit nën rrënojat e dy tërmeteve të fuqishme që goditën Venezuelën të mërkurën e kaluar.
Numri i viktimave ka shkuar në 1,450, ndërsa dhjetëra mijëra persona vazhdojnë të rezultojnë të zhdukur. Lajmin e bëri të ditur presidenti i Parlamentit të Venezuelës, Jorge Rodriguez, i cili deklaroi se vendi po përjeton fatkeqësinë natyrore më të rëndë në historinë e tij.
Sipas autoriteteve, 774 ndërtesa kanë pësuar dëmtime të rënda, ndërsa 189 prej tyre janë shembur plotësisht. Nga ana tjetër, Kombet e Bashkuara vlerësojnë se rreth 50 mijë persona ende figurojnë të zhdukur.
Megjithëse kanë kaluar disa ditë nga tërmetet, ekipet e shpëtimit vazhdojnë të nxjerrin të mbijetuar nga rrënojat. Në qytetin bregdetar Caravajeda, një burrë dhe djali i tij adoleshent u shpëtuan të gjallë pothuajse katër ditë pas katastrofës. Ata u nxorën nga rrënojat nga ekipet amerikane dhe franceze të shpëtimit, të rraskapitur, por në gjendje të gjallë.
Ndërkohë, pamjet e një burri që shpërthen në lot sapo nxirret nga rrënojat janë bërë virale në rrjetet sociale, duke u kthyer në simbol të dhimbjes, por edhe të shpresës që vazhdon të mbijetojë mes shkatërrimit.