Gazetarja dhe moderatorja Aulona Musta ishte e ftuara e radhës në podcastin e Grida Dumës, ku zhvilloi një nga intervistat më personale të viteve të fundit.
Me sinqeritetin që e karakterizon, ajo foli për lumturinë, mënyrën si ka ndërtuar jetën e saj, marrëdhënien me komentet në rrjetet sociale, frikën që përjetoi kur dyshoi për një problem serioz shëndetësor, si edhe për karrierën në media, martesën dhe vajzën e saj.
Aulona u shpreh se nuk ndikohet nga fyerjet në rrjet, madje i sheh ato me humor. “Unë fitoj para edhe nga sharësit”, tha ajo, duke shtuar se kritikët mund t’ia thonë të njëjtat gjëra edhe përballë.
Moderatorja ndau edhe një nga periudhat më të vështira të jetës, kur disa analiza ngritën dyshime për praninë e një tumori. Ajo rrëfeu frikën, ankthin dhe procesin e gjatë të kontrolleve mjekësore deri në marrjen e përgjigjeve përfundimtare.
Në bisedë, Aulona u ndal edhe te fillimet e saj në media, duke kujtuar eksperiencën në “Kafazi i Artë”, punën në gazetën “Paloma” dhe rrugëtimin që e çoi drejt ndërtimit të një karriere të pavarur.
E pyetur nëse do t’i hynte ndonjëherë politikës, ajo u përgjigj me ironi se atë fushë ua ka lënë influencerëve, ndërsa vetë do të vazhdojë t’i përkushtohet profesionit që ka zgjedhur prej vitesh.