Një efektiv i Policisë së Kosovës ka humbur jetën në një aksident tragjik të ndodhur pranë pikës kufitare të Vërmicës, në Morinë.
Ngjarja ka ndodhur në orët e para të mëngjesit të 29 qershorit, rreth orës 02:30. Viktima është identifikuar si Rexhep Gashi, 59 vjeç, zyrtar i Policisë së Kosovës i angazhuar në pikën kufitare të Vërmicës.
Sipas Policisë së Kosovës, në momentin e aksidentit, Gashi ishte duke patrulluar në këmbë pranë pikë-kalimit kufitar dhe po tentonte të kalonte rrugën, kur u përplas nga një automjet që po lëvizte në drejtim të Vërmicës. Për shkak të plagëve të marra, ai humbi jetën në vendngjarje.
Drejtuesi i automjetit, D.D., 28 vjeç, shtetas shqiptar, është shoqëruar dhe ndaluar nga policia. Rasti i është referuar Prokurorisë Themelore në Prizren, e cila ka nisur hetimet për zbardhjen e plotë të rrethanave të aksidentit.