Ministrja e Ekonomisë dhe Inovacionit, Delina Ibrahimaj, deklaroi se kanë nisur hapat për zhvillimin e projektit në ishullin e Sazanit, ndërsa theksoi se shteti shqiptar do të jetë bashkëpronar dhe bashkëinvestitor në këtë iniciativë.
Gjatë një konference për shtyp, e pyetur nga gazetarët nëse projekti për Sazanin ekziston, Ibrahimaj bëri të ditur se aktualisht po zhvillohen negociata me kompaninë investitore për përqindjen e pjesëmarrjes së shtetit shqiptar.
Pyetje: Ekziston projekti në Sazan?
Ibrahimaj: “Në Sazan kemi filluar punën për të bërë disa veprime në lidhje me zhvillimin e zonës. Sazani është një ishull i cili do të mbetet në pronësi të shtetit shqiptar. Shteti do të futet si bashkëpronar, bashkëinvestitor. Jemi duke negociuar me kompaninë për përqindjen që do të ketë shteti shqiptar. Sapo të kemi një pasqyrë më të qartë, do t’i bëjmë transparente.”