Spitali Universitar i Traumës ka përditësuar gjendjen shëndetësore të personave të plagosur në aksidentin e rëndë të ndodhur në autostradën Tiranë–Durrës.
Sipas njoftimit të Ministrisë së Shëndetësisë, pesë pacientë, të cilët u paraqitën në spital të vetëdijshëm dhe në gjendje të stabilizuar, kanë përfunduar trajtimin mjekësor dhe janë larguar jashtë rrezikut për jetën, me rekomandimin e mjekëve.
Një tjetër pacient pritet të dalë nga spitali gjatë ditës së sotme, pasi gjendja e tij shëndetësore është stabilizuar.
Në Reanimacion vijon të trajtohet një fëmijë 8-vjeçar, i cili ndodhet në gjendje të qëndrueshme me parametra jetësorë stabël. Po në këtë repart ndodhet edhe një shtetase vietnameze me nënshtetësi çeke, 56 vjeç, e cila është nën monitorim intensiv. Edhe pse parametrat jetësorë janë stabël, ajo vijon të jetë në gjendje të rëndë për shkak të dëmtimeve të shumta të pësuara.
Ndërkohë, një 14-vjeçar ndodhet i shtruar në pavion, jashtë rrezikut për jetën, nën kujdesin e stafit mjekësor, pasi ka pësuar dëmtime në gjymtyrët e poshtme.
Sa u përket pacientëve të tjerë që ndodhen ende në observimin e Urgjencës dhe i janë nënshtruar ndërhyrjeve kirurgjikale, Spitali i Traumës bën me dije se gjendja e tyre është stabilizuar, por ata do të vijojnë të mbahen nën monitorim intensiv. Mes tyre është edhe një shtetase çeke me origjinë vietnameze, 20 vjeç.