Një efektiv policie ka mbetur i lënduar gjatë përplasjeve të ndodhura para Kuvendit mes protestuesve dhe forcave të rendit.
Pas ngjarjes, kryetari i grupit parlamentar të Partisë Socialiste, Taulant Balla, ka reaguar në rrjetet sociale, ku ka publikuar edhe një foto të efektivit të gjakosur dhe ka dënuar dhunën ndaj policisë.
Në reagimin e tij, Balla u bëri thirrje qytetarëve të distancohen nga aktet e dhunës, duke theksuar se sulmet ndaj punonjësve të policisë përbëjnë sulm ndaj shtetit.
“Gjaku i policisë është gjaku i shtetit. Kush ngre dorë kundër punonjësit të policisë, ka ngritur dorë kundër shtetit”, shkroi Balla.
Ai shtoi se Policia e Shtetit i shërben vendit dhe qytetarëve me përkushtim dhe përballet çdo ditë me rreziqe në ushtrimin e detyrës, duke theksuar nevojën për respekt ndaj uniformës blu.