Ministri i Brendshëm, Besfort Lamallari, ka vizituar në Spitalin e Traumës tre efektivët e Policisë së Shtetit të lënduar gjatë incidenteve të ndodhura sot jashtë ambienteve të Kuvendit.
Sipas ministrit, dy prej efektivëve kanë pësuar dëmtime në kokë si pasojë e goditjeve me gurë, ndërsa gjendja e tyre shëndetësore është e stabilizuar.
“Janë dëmtuar në kokë. Dua të siguroj familjarët se gjendja e tyre është stabël. Kam një mesazh për ata vandalë që guxuan të hedhin gurë drejt efektivëve: janë identifikuar, do të shoqërohen dhe do të marrin përgjigjen më shembullore që parashikon ligji. Kjo nuk ka të bëjë fare me protestën, ky është akt kriminal”, deklaroi Lamallari nga Spitali i Traumës.
Ministri theksoi se personat e përfshirë në sulmin ndaj policëve janë identifikuar dhe do të përballen me procedurat ligjore.