Katër persona humbën jetën dhe 10 të tjerë mbetën të plagosur nga sulmet e reja ruse të zhvilluara gjatë natës në rajone të ndryshme të Ukrainës, ndërsa bilanci i viktimave nga bombardimi masiv i një dite më parë në Kiev është rritur në 30, sipas autoriteteve ukrainase.
Në rajonin e Sumyt, një dron rus goditi një banesë, duke vrarë dy gra, një burrë të moshuar dhe një vajzë nën moshën dy vjeç. Tre persona të tjerë u plagosën, bëri të ditur kreu i administratës ushtarake rajonale, Oleh Khryhorov.
Ndërkohë, në Kryvyi Rih, qyteti i lindjes së presidentit ukrainas Volodymyr Zelensky, shtatë persona u plagosën pas një sulmi me raketa që goditi një zonë të banuar, sipas kreut të Këshillit të Mbrojtjes së qytetit, Oleksandr Vilkul.
Në Kiev është shpallur ditë zie pas sulmit më të rëndë rus ndaj kryeqytetit ukrainas që nga nisja e pushtimit në vitin 2022. Bilanci i viktimave është rritur në 30, pasi ekipet e shpëtimit nxorën edhe tre trupa të tjerë nga rrënojat. Më herët autoritetet kishin raportuar për 27 të vdekur dhe 91 të plagosur.
Bombardimet shkaktuan shembjen e blloqeve të tëra të apartamenteve, goditën një ndërtesë ku ishin vendosur ambulanca dhe dëmtuan një godinë ku banojnë disa diplomatë, sipas zëdhënëses së Bashkimit Evropian, Anita Hipper. Gjithashtu u shkatërrua një nga depot kryesore të Kryqit të Kuq Ukrainas, ku ruheshin ndihma humanitare.
Gjatë vizitës në zonat e goditura, presidenti Volodymyr Zelensky akuzoi Rusinë se po godet objektiva civile dhe politike për ta detyruar Ukrainën të dorëzohet.
“Rusia po godet objektiva politike vetëm për ta detyruar Ukrainën të heqë dorë nga shteti i saj”, deklaroi Zelensky, duke shtuar se Ukraina do t’u përgjigjet këtyre sulmeve.
Edhe kryebashkiaku i Kievit, Vitali Klitschko, e cilësoi bombardimin si sulmin më masiv ndaj kryeqytetit që nga fillimi i luftës dhe shpalli të premten ditë zie.
Nga ana tjetër, zëdhënësi i Kremlinit, Dmitry Peskov, deklaroi se Rusia do të vazhdojë të shtojë presionin ushtarak ndaj Ukrainës për të arritur objektivat e saj.
Presidenti Zelensky u bëri sërish thirrje aleatëve perëndimorë të forcojnë mbrojtjen ajrore të Ukrainës, duke shprehur shpresën se kjo çështje do të jetë pjesë e diskutimeve në samitin e ardhshëm të NATO-s.
Presidenti amerikan Donald Trump deklaroi se dëshiron arritjen e një marrëveshjeje paqeje mes Ukrainës dhe Rusisë për t’i dhënë fund, sipas tij, “vrasjeve të pakuptimta”.
Ndërkohë, Gjermania vlerësoi se sulmi dëshmon mungesën e vullnetit të presidentit rus Vladimir Putin për negociata, ndërsa Franca kritikoi vendosmërinë e Moskës për të vazhduar luftën.
Edhe Sekretari i Përgjithshëm i OKB-së, Antonio Guterres, dënoi bombardimet dhe bëri thirrje për uljen e tensioneve dhe arritjen e një armëpushimi.
Nga ana e saj, Ministria ruse e Mbrojtjes deklaroi se sulmet ishin një përgjigje ndaj, siç i cilësoi, “akteve terroriste” të Ukrainës kundër infrastrukturës ruse. Sipas Moskës, objektivat ishin ndërmarrje të industrisë ushtarake dhe infrastruktura energjetike në Kiev dhe rajonin përreth.
Në të njëjtën kohë, Ukraina ka intensifikuar sulmet me dronë ndaj rafinerive dhe depove të karburantit në territorin rus, duke shkaktuar probleme në furnizimin me karburant në disa rajone të Rusisë.