Presidenti amerikan Donald Trump u bëri thirrje qytetarëve të mbrojnë liritë e përcaktuara nga etërit themelues të Shteteve të Bashkuara 250 vjet më parë, duke paralajmëruar për atë që e cilësoi si “kërcënim komunist” nga demokratët progresivë. Deklaratat ai i bëri gjatë një fjalimi në Malin Rushmore, në kuadër të festimeve për 250-vjetorin e pavarësisë së SHBA-së.
Në fjalimin me tone patriotike, Trump vlerësoi trashëgiminë e katër presidentëve amerikanë, fytyrat e të cilëve janë të gdhendura në Malin Rushmore – George Washington, Thomas Jefferson, Abraham Lincoln dhe Theodore Roosevelt.
“Ne qëndrojmë nën monumentin e këtyre heronjve, një grup njerëzish vërtet të pabesueshëm, dhe ne riangazhohemi të jemi një komb po aq i madh, i guximshëm, fisnik dhe i madh sa këta gjigantë amerikanë. Dhe kjo nuk është e lehtë për t’u bërë, por ne do ta bëjmë”, tha ai.
Presidenti amerikan paralajmëroi më tej se identiteti amerikan po përballet me një sfidë të re.
“Identiteti ynë amerikan po përballet me një sulm të ri. Ka një ringjallje të kërcënimit komunist në tokën tonë, duke përfshirë edhe nga të sapoardhurit në vendin tonë që përqafojnë ide që janë plotësisht në kundërshtim me mënyrën tonë të jetesës dhe suksesin tonë të madh. Ne nuk do ta lejojmë që kjo të ndodhë”, deklaroi Trump.
Duke iu referuar emigracionit, ai e lidhi retorikën e tij antikomuniste me politikat e tij kundër emigracionit, një nga temat kryesore të axhendës së tij politike.
“Ne jemi të vendosur dhe të përkushtuar ndaj të gjithëve që qytetarët e Shteteve të Bashkuara do ta mposhtin shpejt komunizmin (…) Do t’i dëbojmë ata shpejt dhe do të vazhdojmë ta ndërtojmë vendin tonë më të madh dhe më të mirë, më të fortë se kurrë. Amerika nuk do të bëhet kurrë një vend komunist!”, u shpreh presidenti.
Trump përsëriti se republikanët nuk duhet të humbasin zgjedhjet e mesit të mandatit të nëntorit, ndërsa sondazhet tregojnë shqetësime brenda partisë për ndikimin e popullaritetit të tij.
“Mund t’i humbasim zgjedhjet e mesit të mandatit vetëm nëse i lejojmë vetes t’i humbasim”, tha ai.
Presidenti kritikoi gjithashtu atë që e quajti përpjekje për të rishkruar historinë amerikane.
“Në vitet e fundit, ka pasur një përpjekje për të humbur shpirtin tonë amerikan, për të na distancuar nga historia jonë”, deklaroi ai, duke përmendur edhe “radikalët dhe ekstremistët” që, sipas tij, sulmojnë historinë e vendit.
Mbrëmjen e 4 korrikut, Trump pritet të mbajë një tjetër fjalim në National Mall në Uashington, në kuadër të aktivitetit “Salute America 250 Celebration & Fireworks”, i cili do të kulmojë me një shfaqje të madhe fishekzjarrësh.
Pavarësisht temperaturave të larta që kanë përfshirë Uashingtonin dhe bregdetin lindor të SHBA-së, Trump tha se nuk do të ndryshojë planet e tij.
“Meqë ra fjala, më 4 korrik do të jetë rreth 107 gradë (Fahrenheit, rreth 41 gradë Celsius) dhe unë do të shkoj dhe do të mbaj një fjalim vërtet të gjatë vetëm për të treguar se mund të bëj gjithçka”, u shpreh ai.
Në prag të festimeve për 250-vjetorin e pavarësisë, SHBA vijon të mbetet thellësisht e polarizuar politikisht. Popullariteti i Trump është vënë nën presion nga lufta në Iran, rritja e kostos së jetesës, politikat e tij ndaj emigracionit, akuzat për përfitime të familjes së tij dhe përpjekjet për zgjerimin e kompetencave presidenciale, të cilat kanë nxitur kritika të forta nga demokratët.
Në një podcast me Usha Vance, bashkëshorten e zëvendëspresidentit J.D. Vance, Trump u shpreh optimist për të ardhmen e vendit.
“Ne kemi një vend të shkëlqyer, por tani për tani është pak në buzë të greminës. Mund të shkojë në njërën ose tjetrën rrugë (…) por ne do ta bëjmë të shkojë në anën tjetër. Dhe ne do ta bëjmë Amerikën më të madhe se kurrë.”
Ndërkohë, organizata Freedom 250, e lidhur me Trump, ka organizuar aktivitete të shumta në kuadër të 250-vjetorit të pavarësisë, duke rivalizuar me komitetin dypartiak “America 250”, çka ka sjellë edhe bojkot nga disa pjesëmarrës.
Sipas një sondazhi të Universitetit Quinnipiac, të publikuar të enjten, 61% e amerikanëve besojnë se vendi nuk i përmbush aktualisht idealet e përcaktuara në Deklaratën e Pavarësisë së vitit 1776.