Një tentativë për trafikimin e rreth 46 kilogramëve kanabis nga Kanadaja drejt Shqipërisë është goditur nga Policia e Tiranës në bashkëpunim me Komisariatin e Policisë Rinas dhe Autoritetet Doganore.
Në kuadër të operacionit të koduar “Suitcases”, është arrestuar në flagrancë një 34-vjeçar, ndërsa dy shtetase janë proceduar penalisht në gjendje të lirë.
Gjatë kontrolleve, shërbimet e policisë konstatuan dy valixhe brenda të cilave ishin fshehur 89 paketime me lëndë narkotike të dyshuar cannabis sativa, në formën e xhelatinës. Sasia e sekuestruar arrin në rreth 46 kilogramë dhe vlera e saj në treg përllogaritet rreth 250 mijë euro.
Në pranga përfundoi shtetasi K. Gj., 34 vjeç, ndërsa u proceduan penalisht A. Gj., 31 vjeçe, dhe L. Sh., 40 vjeçe.
Sipas Policisë, operacioni u zhvillua pas informacioneve të siguruara në rrugë operative dhe veprimeve të shpejta hetimore, të cilat çuan në zbulimin e ngarkesës me lëndë narkotike.
Hetimet vijojnë me përdorimin e metodave speciale për identifikimin e personave të tjerë që mund të jenë të përfshirë në këtë aktivitet kriminal. Materialet procedurale i janë referuar Prokurorisë për veprime të mëtejshme.