Sipas informacioneve zyrtare, presidenti turk Recep Tayyip Erdoğan do të zhvillojë takime dypalëshe me 32 krerë shtetesh dhe qeverish, ndër ta edhe me kryeministrin shqiptar, Edi Rama. Pjesëmarrja e Ramës në samit vlerësohet si pjesë e angazhimit të Shqipërisë në kuadër të NATO-s dhe koordinimit me aleatët për çështjet e sigurisë dhe mbrojtjes.
Në kuadër të samitit, Erdoğan pritet të takohet gjithashtu me presidentin e Shteteve të Bashkuara, Donald Trump, presidentin francez Emmanuel Macron, kancelarin gjerman Friedrich Merz, kryeministrin britanik Keir Starmer, kryeministren italiane Giorgia Meloni, kryeministrin kanadez Mark Carney, sekretarin e përgjithshëm të NATO-s, Mark Rutte, presidentin e Këshillit Evropian, Antonio Costa, presidentin finlandez Alexander Stubb, presidentin sllovak Peter Pellegrini, presidentin bullgar Rumen Radev, si dhe kryeministrin malazez Milojko Spajić.
Sipas agjendës, një nga takimet më të rëndësishme të samitit do të jetë ai kokë më kokë mes Erdoğanit dhe presidentit amerikan Donald Trump, i cili do të pasohet nga një konferencë e përbashkët për shtyp.
Mbrëmjen e sotme, presidenti turk dhe bashkëshortja e tij, Emine Erdoğan, do të shtrojnë një darkë zyrtare për krerët e shteteve dhe qeverive pjesëmarrëse. Ndërkohë, më 8 korrik, liderët do të zhvillojnë seancën plenare të samitit, pas realizimit të fotos tradicionale familjare.