Qendra Kombëtare e Biznesit (QKB) u ka bërë thirrje të gjitha subjekteve tregtare që kanë detyrimin ligjor për depozitimin e pasqyrave financiare vjetore për vitin ushtrimor 2025, t’i dorëzojnë ato brenda afatit të përcaktuar, më 31 korrik 2026.
Sipas njoftimit, depozitimi i pasqyrave financiare kryhet në mënyrë elektronike përmes portalit e-Albania, duke përdorur shërbimin “Depozitimi i pasqyrave financiare dhe raporteve të auditimit (për subjektet me administrator shqiptar dhe/ose të huaj)”.
QKB rikujton se mosdorëzimi i pasqyrave financiare brenda afatit ligjor sjell pasoja administrative, në përputhje me parashikimet e ligjit nr. 9723, datë 3 maj 2007, “Për Qendrën Kombëtare të Biznesit”, i ndryshuar.
Dokumentacioni që duhet të depozitohet, kur kërkohet nga legjislacioni në fuqi, përfshin pasqyrat financiare vjetore, raportin e ecurisë së veprimtarisë dhe raportin e auditimit.
Detyrimi për raportimin dhe dorëzimin e pasqyrave financiare u takon subjekteve që janë tatimpagues të Tatimit mbi Fitimin Korporativ ose Tatimit mbi të Ardhurat Personale Biznesore, në rastet kur realizojnë një xhiro vjetore mbi 5 milionë lekë.
QKB u bën thirrje bizneseve të mos e shtyjnë depozitimin për ditët e fundit, me qëllim shmangien e vonesave dhe problematikave teknike gjatë procesit.
Për informacion shtesë ose asistencë teknike, subjektet mund të kontaktojnë QKB-në përmes adresës elektronike [email protected] ose në numrin pa pagesë 0800 80 02.