Kryeministri Edi Rama ka mbërritur në Ankara, ku po zhvillohet Samiti i NATO-s me pjesëmarrjen e liderëve të vendeve anëtare të Aleancës.
Menjëherë pas mbërritjes, kreu i qeverisë shqiptare zhvilloi një takim me sekretarin e Përgjithshëm të NATO-s, Mark Rutte, në kuadër të takimeve që po zhvillohen në margjinat e samitit.
Gjatë qëndrimit në Ankara, Rama pritet të zhvillojë edhe një takim dypalësh me presidentin e Turqisë, Recep Tayyip Erdoğan.
Pjesëmarrja e kryeministrit shqiptar në samit vjen në kuadër të angazhimit të Shqipërisë brenda Aleancës së Atlantikut të Veriut dhe synon forcimin e bashkëpunimit me aleatët, si edhe kontributin në sigurinë dhe mbrojtjen euroatlantike.
Samiti i NATO-s në Ankara pritet të fokusohet në çështje kyçe të sigurisë ndërkombëtare, përfshirë rritjen e investimeve në mbrojtje, mbështetjen për Ukrainën, zhvillimin e industrisë së mbrojtjes dhe sfidat e reja me të cilat përballet Aleanca.