Deputetja e pavarur Rudina Hajdari ka komentuar deklaratat e Presidentit Ilir Meta, i cili ka deklaruar gatishmërinë e tij për të ulur në tryezë palët.
Në një deklaratë të saj Hajdari u shpreh se Meta ka mbajtur qëndrim të njëanshëm dhe se kërkon të bëhet faktor në këto situata.
“Zoti Meta ka qenë aktiv dhe di si të behet faktor në këto situata. Nuk e di nëse ka qene një president politik apo unifikues. E shikoj që nuk ka pasur ndonjë hap prej tij që të mundësojë dialogim midis palëve apo të dalë mbi palët për të arritur një dialog. Përveç titullit si Zoti President, nuk shikoj ndonjë gjë tjetër që ne mund të themi po del mbi palët dhe të jetë unifikues”, është shprehur Hajdari.
Kujtojmë se në Shqipëri prej disa muaj politika është futur në një krizë të thellë. Opozita ka djegur mandatet dhe nuk ka pranuar të marrë pjesë në zgjedhje, ndërsa maxhoranca po vijon fushatën dhe shprehet se zgjedhjet do të bëhen. Nga ana tjetër Meta ka bërë thirrje që palët të ulen në dialog dhe të mos vijojnë me retorikën e fortë.