Një vatër zjarri vijon të mbetet aktive prej dy ditësh në fshatin Lundër, në Njësinë Administrative Ulëz të Bashkisë Mat, ndërsa forcat në terren po punojnë për izolimin dhe shuarjen e flakëve.
Shërbimet zjarrfikëse ndërhynë menjëherë pas sinjalizimit të zjarrit dhe vijojnë operacionin për vënien nën kontroll të situatës. Sipas autoriteteve, ndërhyrja është vështirësuar nga terreni i thyer malor dhe era e fortë, të cilat kanë favorizuar përhapjen e flakëve.
Në operacion janë angazhuar efektivë të shërbimit zjarrfikës të Bashkisë Mat, punonjës të Shërbimit Pyjor të Njësisë Administrative, si edhe struktura të tjera mbështetëse që po punojnë për izolimin e vatrës së zjarrit.
Në afërsi të zonës së përfshirë nga flakët ndodhen edhe banesa, por deri tani ato nuk paraqiten të rrezikuara. Ekipet zjarrfikëse kanë krijuar një perimetër sigurie për të mbrojtur zonën e banuar dhe për të shmangur çdo rrezik të mundshëm.
Operacioni për shuarjen e zjarrit vijon, ndërsa strukturat e angazhuara po monitorojnë nga afër situatën për të parandaluar përhapjen e mëtejshme të flakëve.