Specialistët për Hetimin e Krimeve të Komisariatit të Policisë Lushnjë kanë arrestuar një 57-vjeçar, i dyshuar si autor i një rasti zjarrvënieje që shkaktoi dëme materiale në pronën e fqinjit të tij.
Sipas Policisë, në pranga është vënë shtetasi I. K., banues në fshatin Lumth, i cili një ditë më parë dyshohet se ndezi zjarr në tokën e tij për të djegur mbeturinat. Flakët dolën jashtë kontrollit dhe u përhapën në pronën e fqinjit, shtetasit A. A.
Si pasojë e zjarrit u dogjën një mjet bujqësor (zetor), një rimorkio, si edhe baza ushqimore për blegtorinë, duke shkaktuar dëme materiale.
Gjatë përpjekjeve për të shuar flakët në pronën e tij, A. A. pësoi djegie dhe u transportua në Spitalin e Lushnjës, ku po merr mjekim. Sipas mjekëve, ai ndodhet jashtë rrezikut për jetën.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier për veprën penale “Shkatërrimi i pronës me zjarr”.
Drejtoria Vendore e Policisë Fier u bën thirrje qytetarëve të mos ndezin zjarre në asnjë rrethanë, duke paralajmëruar se shkelësit do të përballen me ligjin. Po ashtu, fton qytetarët të denoncojnë në numrin 112 çdo rast zjarrvënieje apo paligjshmërie tjetër, duke garantuar anonimat dhe reagim të shpejtë.