Kryeministri Edi Rama ka reaguar në rrjetet sociale pak orë përpara koncertit të Kanye West, duke e cilësuar organizimin e këtij eventi si një investim strategjik për promovimin e Shqipërisë në arenën ndërkombëtare.
Përmes një postimi në Facebook, Rama shprehet se stadiumi është gati për koncertin, i cili sipas tij do ta vendosë Shqipërinë në hartën globale të komunitetit të adhuruesve të muzikës, duke tërhequr mijëra vizitorë nga vende të ndryshme të botës.
Kreu i qeverisë iu përgjigj edhe kritikave për koston e organizimit, e cila sipas disa vlerësimeve arrin në rreth 4 milionë euro. Ai theksoi se kjo shumë nuk duhet parë si një shpenzim, por si një investim që do të kthehet në ekonomi përmes rritjes së turizmit, konsumit dhe të ardhurave për bizneset dhe buxhetin e shtetit.
“Një koncert i kësaj përmase nuk është thjesht një ngjarje artistike. Është marketing global për Shqipërinë, një reklamë që do të kushtonte shumë më tepër nëse do të realizohej përmes fushatave tradicionale,” shkruan Rama.
Sipas kryeministrit, kultura nuk përfaqëson vetëm një vlerë artistike, por është edhe një motor zhvillimi ekonomik që ndikon drejtpërdrejt në turizëm, punësim dhe rritjen e konsumit. Ai solli si shembull edhe koncertin e Kanye West në Stamboll, për të cilin pretendon se ka gjeneruar mbi 100 milionë euro vlerë të shtuar për ekonominë lokale.
Në përfundim të reagimit të tij, Rama theksoi se anulimi i një eventi të tillë do të dëmtonte imazhin e Shqipërisë, ndërsa organizimi i tij e promovon vendin si një destinacion të rëndësishëm për evente ndërkombëtare.
“Shqipëria nuk fiton duke u fshehur nga bota. Shqipëria fiton duke e sjellë botën në shtëpinë e saj”, përfundon kryeministri në postimin e publikuar në Facebook.