Komisionerja për Zgjerimin e Bashkimit Evropian, Marta Kos, e cilësoi 14 korrikun si një “Super të Martë” për procesin e zgjerimit të BE-së, duke theksuar se për herë të parë në më shumë se dy dekada po zhvillohen katër konferenca ndërqeveritare të anëtarësimit brenda së njëjtës ditë.
Përmes një video-mesazhi të publikuar në rrjetin social X, Kos vlerësoi përparimin e vendeve kandidate dhe bëri të ditur se Shqipëria do të shënojë një tjetër hap të rëndësishëm në rrugën drejt anëtarësimit, me mbylljen e tre kapitujve të parë të negociatave.
“Sot është një ‘Super e Martë’ për zgjerimin e BE-së. Për herë të parë në më shumë se dy dekada, po mbajmë katër konferenca të anëtarësimit në të njëjtën ditë. Katër vendet që janë në krye të procesit – Ukraina, Moldavia, Shqipëria dhe Mali i Zi – po hedhin të gjitha hapa të rëndësishëm përpara.
Shqipëria do të mbyllë kapitujt e saj të parë, ndërsa Mali i Zi ndodhet në fazën përfundimtare të negociatave formale, pasi ka mbyllur 18 nga 33 kapitujt. Tani, ky momentum i krijuar sot duhet të shndërrohet në rezultate konkrete në terren”, u shpreh Kos.
Delegacioni shqiptar, i kryesuar nga kryeministri Edi Rama, do të formalizojë mbylljen e Kapitullit 25 (Shkenca dhe Kërkimi), Kapitullit 26 (Arsimi dhe Kultura) dhe Kapitullit 30 (Marrëdhëniet e Jashtme), fusha që konsiderohen të harmonizuara me standardet e Bashkimit Evropian.
Konferenca ndërqeveritare do të nisë në orën 19:00, ndërsa në orën 20:00 do të zhvillohet një konferencë për shtyp ku pritet të prezantohet ecuria më e fundit e procesit të integrimit evropian.
Ky zhvillim konsiderohet një tjetër hap përpara në procesin e integrimit të Shqipërisë në BE. Gjatë muajve të fundit, vendi ka përshpejtuar ritmin e negociatave, ndërsa institucionet evropiane kanë vlerësuar progresin në reformat kyçe, veçanërisht në drejtësi, administratë publike dhe përafrimin e legjislacionit me acquis të Bashkimit Evropian.
Autoritetet shqiptare synojnë të përmbyllin negociatat teknike deri në vitin 2027, me objektivin që Shqipëria të anëtarësohet në Bashkimin Evropian deri në fund të dekadës, nëse vijon ritmi i reformave dhe plotësohen të gjitha kriteret e kërkuara.