Një vatër zjarri është aktive mëngjesin e kësaj të marte në lagjen “15 Tetori” në Himarë.
Flakët kanë përfshirë një sipërfaqe me pisha dhe shkurre, ndërsa dyshohet se zjarri është shkaktuar qëllimisht për pastrimin e territorit nga barishtet dhe bimësia. Megjithatë, për shkak të erës, zjarri është përhapur me shpejtësi.
Në vendngjarje kanë mbërritur forcat zjarrfikëse, të cilat po punojnë për vënien nën kontroll dhe shuarjen e flakëve.
Kjo është vatra e dytë aktive e zjarrit që regjistrohet në këtë zonë gjatë ditëve të fundit.
Ndërkohë, zjarri i rënë mbrëmjen e së hënës në zonën e Llamanit, në Himarë, është shuar rreth orës 05:30 të mëngjesit, pas një operacioni gjatë gjithë natës nga pesë automjete zjarrfikëse dhe ekipet e Emergjencave Civile.