Drejtoresha e filialit të Postës Shqiptare në Durrës, Elisabeta Mataj, është shkarkuar nga detyra dhe është kallëzuar për ndjekje penale nga drejtuesit e Postës Shqiptare, pas një kontrolli të ushtruar në filial, ku u konstatuan parregullsi në administrimin e fondeve.
Në një njoftim zyrtar, Posta Shqiptare bëri të ditur se gjatë kontrollit janë evidentuar shkelje në administrimin e fondeve që lidhen me shërbimet e pagesave. Pas verifikimeve janë marrë masa të menjëhershme administrative ndaj punonjësve përgjegjës dhe rasti është referuar në Prokurori përmes një kallëzimi penal.
Sipas burimeve, dyshohet për një abuzim financiar që arrin në rreth 3 milionë euro.
Mësohet se gjatë rakordimit të arkës në fund të muajit u konstatua fillimisht një mungesë prej rreth 1 miliard lekësh. Pas analizave dhe verifikimeve të mëtejshme, rezultoi se vlera e mungesave ishte edhe më e lartë.
Hetimet pritet të përcaktojnë përgjegjësitë dhe përmasat e plota të dëmit financiar.