Teksa Shqipëria po zhvillon Konferencën e IX Ndërqeveritare me Bashkimin Evropian për mbylljen e tre kapitujve të parë të negociatave, kryetari i Partisë Demokratike, Sali Berisha, ka zgjedhur të paraqesë situatën në vend me akuza të forta në një forum ndërkombëtar të qendrës së djathtë.
Gjatë fjalës së tij në Asamblenë e Përgjithshme të IDC-CDI-së, Berisha deklaroi se “narkoshteti i Edi Ramës është kthyer në një rrezik të madh”, duke shtuar se në Shqipëri nuk zhvillohen më zgjedhje të lira, por vetëm “farsa elektorale”.
Deklaratat u mbajtën përpara përfaqësuesve të partive të qendrës së djathtë nga vende të ndryshme të botës, duke e çuar edhe një herë debatin politik shqiptar në një forum ndërkombëtar.
Kjo nuk është hera e parë që Berisha përdor skena ndërkombëtare për të denoncuar qeverinë shqiptare. Deklaratat e tij vijnë në një moment kur Shqipëria po avancon në procesin e integrimit evropian, me mbylljen e tre kapitujve të parë të negociatave për anëtarësim në Bashkimin Evropian.