Ministri për Evropën dhe Punët e Jashtme, Ferit Hoxha, reagoi në platformën “X” duke dënuar deklaratën e një anëtari të Qeverisë së Serbisë për spastrimin etnik në Kosovë, duke e cilësuar atë të papranueshme dhe fyese për viktimat e luftës.
Ai theksoi se askush nuk mund të ndërtojë besim duke rikthyer hijet më të errëta të së kaluarës apo duke lartësuar politika dhe figura që mbajnë përgjegjësi për tragjeditë dhe krimet e kryera në rajon.
Më tej, Hoxha nënvizoi se procesi i normalizimit të marrëdhënieve dhe pajtimit mes Kosovës dhe Serbisë kërkon përgjegjësi, reflektim dhe guxim për t’u përballur me të kaluarën.
Reagimi i ministrit të Jashtëm:
“Deklarata e një anëtari të qeverisë së Serbisë, që shpreh publikisht keqardhje që në Kosovë nuk është kryer një spastrim etnik edhe më i madh, është e papranueshme, tronditëse dhe një fyerje e rëndë për viktimat e luftës.
Relativizimi dhe normalizimi i një prej krimeve më të rënda kundër njerëzimit, krime të dënuara nga historia, nga drejtësia ndërkombëtare dhe nga vetë ndërgjegjja njerëzore, bien ndesh me vlerat mbi të cilat është ndërtuar Evropa e sotme.
Ato minojnë përpjekjet për pajtim dhe bashkëpunim, ushqejnë mosbesimin dhe urrejtjen, si dhe rihapin plagë që ende nuk janë shëruar.
Askush nuk mund të ndërtojë besim duke rikthyer hijet më të errëta të së kaluarës, aq më pak duke lartësuar politika dhe figura që mbajnë përgjegjësi për tragjedi, vuajtje dhe krime që kanë lënë gjurmë të thella në historinë e rajonit tonë siç është “kasapi i Ballkanit“.
Procesi i normalizimit dhe i pajtimit, për të cilin Kosova, Serbia dhe i gjithë rajoni ynë kanë aq shumë nevojë, kërkon para së gjithash përgjegjësi, reflektim dhe guxim për t’u përballur me të kaluarën.
Ai nuk mund të ndërtohet kurrë mbi deklarata që justifikojnë apo lartësojnë politikat që sollën aq shumë dhimbje e shkatërrim, por vetëm e vetëm mbi të vërtetën, respektin për viktimat dhe angazhimin e sinqertë për një të ardhme të përbashkët evropiane“, tha ministri Hoxha.
Çfarë deklaroi ministrja serbe
Ministrja serbe të Administratës Publike dhe Vetëqeverisjes Lokale në Qeverinë e Serbisë, Snezhana Paunoviç, ka deklaruar se “po të ishte në vend të Sllobodan Millosheviçit më 1998, do ta spastronte etnikisht Kosovën“.
Këtë deklaratë ministrja serbe e ka bërë gjatë një interviste në televizionin serb “Kurir”.
“Po të kisha qenë në vendin e Millosheviçit në vitin 1998 do ta pastroja etnikisht Kosovën. Dhe ky është kualifikimi më i ashpër që e kam thënë ndonjëherë. Jo në mënyrën se si po duan ata të na likuidojnë neve, por në atë mënyrë që të mos ndihen pjesë e Serbisë dhe të shkojnë në shtetin e tyre amë“, u shpreh ajo.